அஜாடிகள்

அஜாடிகள் - அதாவது ஜாடை தெரியாதவர்கள் கச்சேரியில் முன் வரிசையில் உட்கார்ந்து விடக்கூடாது என்று விளாத்திகுளம் சுவாமிகள் சொல்வாராம் . கி.ரா சொன்னார் என்னிடம் .


டி.என் .ராஜரத்தினம் பிள்ளை சுவாமி புறப்பாட்டின் போது நடந்து கொண்டே வாசிக்கும் போது ஒருவன் முன்னால் அவர் பார்க்கும்படியாக பிரமாதமாக சொடக்கு போட்டு தலையை ஆட்டி கொண்டே வந்தானாம் . தோடி இவருடைய பிரத்யேக ராகம் . அரைமணி நேரம் நடந்து கொண்டே இவர் வாசித்து முடித்தவுடன் , அவரிடம் அந்த பிரமாதமாக ஆகாகாரம் போட்டு ரசித்துகொண்டே வந்த அந்த ஆள் ' அடுத்த படியாக தோடி வாசிங்கோ ' என சத்தமாக சொல்லியிருக்கிறான் . ராஜரத்தினம் தன் பக்கத்தில் ஒத்து ஊதி கொண்டு வந்தவன் முதுகில் ஒரு போடு போட்டாராம் .
" எங்கேடா அந்த தோடி வாசிக்கிற நாகஸ்வரம் . எடுத்துட்டு வரலையா "
எந்த கலைஞனுக்கும் இந்த அஜாடிகள் அலர்ஜி தான் .

புதுமைபித்தனின் ' சிற்பியின் நரகம் ' கதையில் வரும் சிற்பிக்கு இந்த உளைச்சல் தானே .
எதற்கு சொல்கிறேன் என்றால் எழுத்துக்கும் இது பொருந்தும் .
தத்து பித்து என்று பல பின்னூட்டங்களை பார்க்கும்போது இந்த அஜாடிகளை என்ன செய்ய என்று தோன்றும் . வடிகட்டி தான் போடவேண்டும் .அப்படி நிர்த்தட்சன்யமாக புறக்கணித்து விட வேண்டியிருக்கிறது .

There are obvious dangers in the pleasure of Blog writing!