பந்த்

அநேகமாக இது தான் முதல் முறை. ஒத்த கருத்து திமுக ,அதிமுக இடையே அபூர்வம் . ஈவு இரக்கமற்ற விடுதலைப்புலிகளை கருணாநிதியும் ஜெயலலிதாவும் ஆதரிக்கவில்லை என்பது ஒரு வரலாற்று ஆச்சரியம் . முதல் முறையாக ஆளுங்கட்சி ,பிரதான எதிர்க்கட்சி ஆதரவில்லாமல் தமிழகத்தில் ஒரு பந்த் இன்று நடக்கிறது . சர்வாதிகார விடுதலைப்புலிகள் பற்றி கடுமையாக கருணாநிதி கருத்து தெரிவித்திருக்கிறார். உமா மகேஸ்வரன் , பத்மநாபா , அமிர்தலிங்கம் கொலைகள் அப்போதே கருணாநிதியை கலங்க வைத்தது . தமிழ் ஈழம் அமைந்தால் சர்வாதிகார ஆட்சி தான் என்ற பிரபாகரனின் பேட்டி அன்று அவரை மாற வைத்தது . அது தான் இன்று கருணாநிதியை 'கருணா' பற்றி சகஜமாக ஆதரவுக்கருத்து சொல்லவைக்கிறது . ஜெயலலிதா இந்த விடுதலைப்புலி எதிர்ப்பு நிலையை வெளிப்படையாக பல வருடம் எடுத்துள்ளவர்.ஆனால் இலங்கை தமிழ் மக்களுக்கும் எதிர்ப்பு நிலை எடுத்து விட்டது போல இலங்கை ராணுவத்துக்கு ஆதரவாக பேசுவது தான் துரதிர்ஷ்டம் .

வைகோ, ராமதாஸ் , திருமாவளவன் ஆகியோரின் வெளிப்படையான விடுதலைப்புலி ஆதரவு ஒரு வக்கிரம் . இலங்கை மக்கள் நிலை பற்றி செஞ்சிலுவை சங்கம் கூறியுள்ள செய்திகளில் இலங்கை அரசின் ஈன குணம் மீண்டும் ,மீண்டும் நிரூபணமாகிறது .

இந்த பழ நெடுமாறன் முன்பு இந்திராகாந்தியை திமுக காரர்கள் மதுரையில் தாக்கிய போது அவர் மீது அடி படாமல் காப்பாற்றி ,மண்டை உடைந்து "கண்ணகியை அடித்து விட்டீர்கள் ,மதுரையே பற்றி எரியபோகிறது " என்று ஆவேசப்பட்டவர் . காங்கிரஸ் அட்ஹாக் கமிட்டியில் இந்திரா காந்தி "My son who saved my life!" என்று பெருமிதத்துடன் அறிமுகப்படுத்தினார். அந்த இந்திராகாந்தியின் மகனை கொன்றவர்களை நெடுமாறன் இன்று ஆதரிப்பது ஒரு வரலாற்று முரண்.தமிழகத்தின் முதல் "மாவீரன்" நெடுமாறன் தான் தெரியுமா ? இன்று அந்த பட்டம் ஒரு நூறு பேர் பெற்றுக்கொண்டிருக்கிறார்கள் .

கண்ணதாசன் இந்த மதுரை நெடுமாறன் பற்றி மிக பிரமாதமாக வன வாசத்தில் எழுதியிருக்கிறார் . திமுகவை விட்டு நாற்பத்தைந்து வருடங்களுக்கு முன் சம்பத்தோடு வெளியேறி, 'திராவிட இயக்கத்தின் இரும்புமனிதர்' மதுரைமுத்துவுக்கு எதிராக தைரியமாக அரசியல் செய்தவர் தான் நெடுமாறன். அப்போது தான் மதுரை மக்களுக்கு இவர் மாவீரன் ஆனார் !