Share

Oct 18, 2017

சிட்டியாலா ராமச்சந்திரன்


சி.ராமச்சந்திரன். பெயரில் உள்ள இனிசியல் ஊரின் பெயர். ஆந்திராவில் விஜயவாடாவிலிருந்து ஹைதராபாத் போகும் வழியில் சிட்டியாலா (chitiyala) ரயில்வே ஸ்டேசன் இருக்கிறது. இந்த ஊரைச் சேர்ந்தவர் சிட்டியாலா ராமச்சந்திரன். அவர் பரம்பரையில் யாரும் அப்பா பெயரை இனிசியலாக போட மாட்டார்கள். ஊர் பெயரை தான் குறிப்பிடுவார்கள்.
சிட்டியாலா ராமச்சந்திரன் அவர்களுக்கு வயது இப்போது எண்பத்தெட்டு.

கூத்துப்பட்டறையின் டிரஸ்ட் மெம்பர். கூத்துப்பட்டறை விவகாரங்களில் பெரும்பங்கு வகிப்பவர்.
மறைந்த வக்கீல் பாகீரதி மூலமாக ந.முத்துசாமிக்கு அறிமுகமானவர்.
என்னுடைய Dress sense ஐ ரொம்ப ரசிப்பவர் சிட்டியாலா.

வேடிக்கையாக என்னிடம் பேசிக்கொண்டே இருப்பார்.
’சார், சீக்கிரமா பார்லிமெண்ட் மெம்பர் ஆகிடுங்க. எம்.பிக்கு அலவன்ஸ், சம்பளமெல்லாம் லட்சக்கணக்கில தர்றாங்களாம்’ – திடீரென்று ஒரு நாள் ஸ்ட்ரேன்சாக இப்படிக்கூட என்னிடம் சொன்னார்.
முதுமை அவருடைய பேச்சில் அழகான மழலையை கொண்டு வந்திருக்கிறது.
தன் கல்லூரி வாழ்க்கையை என்னிடம் நினைவு கூர்ந்தார்.
சிட்டியாலா ராமச்சந்திரன் திருநெல்வேலி இந்துக்கல்லூரி மாணவர்.
மதுரை திரவியம் தாயுமானவர் ஹிண்டு காலேஜ்.
மதுரை திரவியம் தாயுமானவர் தான் இந்துக்கல்லூரியின் ஃபவ்ண்டர்.
இந்த நெல்லை இந்துக்கல்லூரி பற்றி காதில் விழும்போது அதில் படித்த புதுமைப்பித்தன் நினைவுக்கு வருவார்.
ஜூனியர் பி.ஏ. பாலக்காட்டில் படித்த சிட்டியாலா ராமச்சந்திரன் சீனியர் பி.ஏ இந்துக்கல்லூரிக்கு வந்திருக்கிறார்.
இந்துக்கல்லூரி முதல்வர் பெயர் அலெக்சாண்டர் ஞானமுத்து.
ஷேக்ஸ்பியர் பாடம் இவர் பிரமாதப்படுத்துவார்.
ப்ரொஃபசர் பொன்னுசாமி பிள்ளை இந்து கல்லூரியில் பிரபலமான பேராசிரியர்.
1949ல் ஒரு வசீகர நிகழ்வு திருநெல்வேலியில். தமிழகக் கல்வித்துறை ஒட்டு மொத்தமும் இதை கவனித்து கன்னத்தில் கை வைத்திருக்கும். மூக்கில் விரல் வைத்து நெல்லையில் ஆசிரியர்கள், மாணவர்கள் ஆச்சரியப்பட்டிருப்பார்கள்.
இந்துக்கல்லூரி முதல்வர் அலெக்சாண்டர் ஞானமுத்து மனைவியை இழந்தவர். அவருக்கு ஒரு மகள் உண்டு.
பாளையங்கோட்டை சாரா டக்கர் கல்லூரி பெண்களுக்கானது. இதில் ஒரு பெண் தான் முதல்வர். இவர் கணவனை இழந்தவர். பெண் முதல்வருக்கு பத்து புத்திரங்கள். புள்ளக்குட்டிக்காரர்.
இவர் பெயர் இப்போது சிட்டியாலா ராமச்சந்திரனுக்கு நினைவில்லை.
சாராடக்கர் காலேஜ் பெண் முதல்வரும் இந்து காலேஜ் முதல்வர் அலெக்சாண்டர் ஞானமுத்துவும் திருமணம் செய்து கொண்டார்கள்!
My child and your children are playing with our children!


சிட்டியாலா ராமச்சந்திரன் போஸ்ட் க்ராஜுவேசன் படிப்பு சென்னை தாம்பரம் கிறிஸ்டியன் காலேஜ்.
ஆணழகன் ஜி.என்.பாலசுப்ரமண்யம், காதல் மன்னன் ஜெமினி கணேசன் கிறிஸ்டியன் காலேஜில் படித்தவர்கள் தான்.
அங்கே ராமச்சந்திரனுக்கு பிரின்ஸி பாய்ட் (Boyd).
Absent minded professor Dr.Kibble. கிப்பில் மேத்ஸ் ப்ரொபசர். முதல்வர் பாய்ட், கிப்பில் இருவருமே ஸ்காட்டிஷ். Scotland.
ப்ரஃபசர் கிப்பில் ரோட்டில் கிடக்கும் கல்லைக்கூட எடுத்து வந்து டெமொ செய்து கணக்குப்பாடம் நடத்துவாராம்.
எக்மோரில் காரை நிறுத்தியதை மறந்து விட்டு ட்ரெயின் ஏறி தாம்பரம் வந்து விடுவாராம்.
தண்டலம் தேவநேசன் பாலிடிக்ஸ் ப்ரொஃப்சர். பின்னாளில் அசாமில் ஒரு யுனிவர்சிட்டி வைஸ் சான்ஸலர் ஆகியிருக்கிறார்.
எண்பத்தெட்டு வயதில் தன் ஆசிரியர்களை நினைவு கூறும் சிட்டியாலா ராமச்சந்திரன் சார்.
………………………………..

1 comment:

  1. So much in a life time, so much to reminisce, you are an incredible man Mr.Rajanayahem.

    ReplyDelete

Note: Only a member of this blog may post a comment.